موضوع اهمال الاطباء في مصحة يشفين،،تاجوراء امة اقرا

اهمال الاطباء في مصحة يشفين،،تاجوراء

السلام عليكم ورحمة الله وبركاته،،
كيف حالكم خواتي بنات ليبيا،،،
هذه اول مشاركة ليا في المنتدى،،

حبيت نحكي قصة اختي ،،نبي نفضفض اللي في خاطري ليكم،،،
لان ملقيناش من يسمعنا ولمني نشكوا،،،
وسامحوني كان حطيت الموضوع مش في قسمه لاني معرفتش القسم اللي نحطه فيه!!

قصتها مسكينة قتلولها بنتها في جريمة حدثت في مصحة يشفين التخصصية بتاجوراء
ارتكبوها مجموعة من الاطباء وعلى رأسهم. دكتورة رحاب أحمد.
هذه المصحة عديمة الانسانية قتلوا بنت اختي
القصة ومافيها انها ميكينة مشت في وضع ولادة فرحانة ببنيتها اللي تستنى فيها طول ال9شهور
مشت للمصحة .. وكانت بنتها وزنها 4كيلو و90 جرام
والمفروض انهم ايولدوها بالعملية على طول من غير كلام.. لانها بكرة وصعب بكرة تجيب وزن زي هذا طبيعي،،

ولأن كان عندهم زحمة في حجرة العمليات و الدكتورة رحاب احمد معندهاش الخبرة الكافية باش تكون دكتورة نساء،
دخلتها ع الولادة الطبيعية وقعدت المسكينة تحت الالم الصناعي ... وتتوجع من 10الصبح ،،وبكل المحاولات تعسرت الولادة بحكم الوزن الكبير للبيبي ،،، استعملوا معاها الشفاطة المطاطية لشفط البنت .. جبدوها مع راسها ومع ذلك تعسرت وماصار شي،،، قررولها عملية بعد فوات الاوان
..تخايلوا الاهمال اللي في المصحة،،

مسكينة تتألم بالوجع الصناعي وهما يتصلوا بدكتور التخدير اللي روح ومش موجود في حجرة العمليات،،
والدكتورة رحاب احمد متقدرش ادير العملية بروحها..

اتصلوا بدكتور فيصل الامين اللي حتى هو مروح مهناش
شن يجيبهم من حياشهم.. والعيل صاير فيه اللي صار
بعد نص ساعة جو حضرتهم الدكاترة
ودخلوها للعملية.. وبعد العملية قالولها بنتك توفت!!!!


شوفوا الاهمال الطبي لوين يوصل
حسبي الله ونعم الوكيل،،،
ومسكينة بعد كل التعب شوفوا شن صارلها هي صبرت وحتسبت لله والبنت اكيد دخر في الجنة،،،
لكن الاهمال متع الدكاترة عديمين الانسانية ماينتساش،،
وطبعا لما جابولهم البنية شافوها منحكيلكمش كيف عينها مفقوصة ووجها ازرق وراسها كله مزطوهولها بالشفاطة،،
وباش يغطوا ع جريمتهم قالوا لزوجها ارفع بنتك ادفنها بسرعة معادش تستحمل،،باش عارهم يتغطى،،
وهو مسكين مشي ودارولها جنازة دفنوها من غير تقرير طبيب شرعي ،،
ولما قالولهم شن سبب وفاة بنتنا ؟
مبوش يعترفوا بالخطأ متعهم ،،،ولا يعتذروا ولا يقولوا حتى كيف ماتت البنت ،،ولاسبب وفاتها،،
حسبنا الله ونعم الوكيل ،،
وكان البنت ماتت لسبب مرضي ماكانوش خلوها في المصحة لمدة اسبوع ع حسابهم ،،وقالولهم متخلصوا شي ،،،وماتدفعوش،،
وتخايلوا باش الناس متسمعش ،وباش سمعتهم ماتتشوهش
حولوها في حجرة فردية ،،،وهذا كله ع حسابهم،، المهم باش الناس متسمعش حقيقتهم ...عديمي الانسانية والضمير ،،،
وطبعا بعد العملية مسكينة طلعوا ضاربينلها المثانة البولية وقاعدة تعاني لتوا،،،

هذه القصة صارت في يوم الاحد 26/11/2013
في
مصحة يشفين تاجوراء،، والمصحة مشهورة بحالات الوفيات للأم والجنين،،،

هذه المصحة لدكتور عبد الحفيظ بو ظهير
والدكتورة رحاب احمد هي اللي ولدتها هي والدكتور فيصل الامين..
والدكتور ميسرة متع التخدير،،، اللي طالع من حجرة العمليات،،
هذه هي العصابة اللي قتلوا البنت ومابوش يعترفوا بخطأهم،،،

والدكتور نظال دكتور الاطفال هو اللي عنده كل شي ويعرف سبب وفاة البنية وتستر ع زملائه ، وماباش يقول السبب ،والساكت عن الحق شيطان اخرس،، . ،،، فلهذا ينضم لصفوف اصحاب الجريمة،،
حسبنا الله ونعم الوكيل،،،،،، فيكم يا مصحة يشفين ،

المصدر: منتديات بنات ليبيا

---

hilhg hgh'fhx td lwpm datdkKKjh[,vhx